ប៉ូលិស​ឥណ្ឌូនេស៊ី​ចាប់ខ្លួន​មេដឹកនាំ​បណ្តាញ​ដែលមាន​ទំនាក់ទំនង​ជាមួយ​ពួក​អាល់​កៃ​ដា

អាជ្ញាធរ​បាន​និយាយ​កាលពី​ថ្ងៃ​អង្គា​រថា ប៉ូលីស​ឥណ្ឌូណេស៊ី​បាន​ចាប់ខ្លួន​មេដឹកនាំ​នៃ​បណ្តាញ​សកម្មប្រយុទ្ធ​ក្រុម Jemaah Islamiyah (JI) ដែល​ជាប់ទាក់ទង​នឹង​ពួក​អាល់​កៃ​ដា ដោយ​សង្ស័យថា​បានជ្រើសរើស​សមាជិក​ថ្មី និង​បញ្ជូន​ពួកគេ​ទៅ​ប្រទេស​ស៊ី​រី​ដើម្បី​ហ្វឹកហាត់​ជាមួយ​ក្រុម​ជ្រុលនិយម។

ប៉ូលិស​ប្រឆាំង​ភេរវកម្ម​ក៏បាន​ចាប់ខ្លួន​ជនសង្ស័យ ៤ នាក់​ផ្សេងទៀត​ដែលមាន​ទំនាក់ទំនង​ជាមួយ​លោក Para Wijayanto ដែល​អ្នកជំនាញ​និយាយថា​ជា​សិស្ស​របស់លោក Abu Bakar Basyir ដែល​ត្រូវបាន​ចោទប្រកាន់ថា​ជា​មេគំនិត​នៃ​ការ​បំផ្ទុះ​គ្រាប់បែក​នៅ​កោះ​បាលី​ឆ្នាំ ២០០២ ដែល​សម្លាប់​មនុស្ស​ជាង ២០០ នាក់។

លោក Wijayanto ដែល​បាន​រត់គេចខ្លួន​ចាប់តាំងពី​ឆ្នាំ ២០០៣ និង​បានទទួល​ការហ្វឹកហ្វឺន​ជាមួយ​ពួក​សកម្មប្រយុទ្ធ​នៅ​ភាគខាងត្បូង​ប្រទេស​ហ្វីលីពីន​ត្រូវបាន​គេ​ចាប់ខ្លួន​ជាមួយនឹង​ប្រពន្ធ​របស់គាត់​កាលពី​ថ្ងៃ​សៅរ៍​នៅ​ជាយក្រុង​រដ្ឋធានី​ហ្សា​កាតា។

អ្នកនាំពាក្យ​ប៉ូលីស​ជាតិ​លោក Dedi Prasetyo បាន​ប្រាប់​រ៉​យ​ទ័​រថា “​ក្រុម Jemaah Islamiyah (JI) នៅតែ​ជាការ​គំរាមកំហែង​មួយ ពីព្រោះ​យុទ្ធសាស្ត្រ​ដ៏​ធំ​របស់​ពួកគេ​គឺ​នៅតែ​បង្កើត​ឲ្យ​មាន​ការិយាល័យ​ព្រះ​ចៅ​កាលី​ហ្វ”។

កងឯកភាព​ប្រឆាំង​ភេរវកម្ម​ត្រូវបាន​គេ​ស្គាល់​ថា Densus 88 របស់​ប្រទេស​ឥណ្ឌូនេស៊ី​ត្រូវបាន​បង្កើតឡើង​បន្ទាប់ពី​មានការ​បំផ្ទុះ​គ្រាប់បែក​នៅ​កោះ​បាលី​ឆ្នាំ ២០០២ ក្នុងការ​កម្ចាត់​ក្រុម JI និង​ក្រុម​ប្រហាក់ប្រហែលគ្នា​នៅក្នុង​ប្រទេស​ភាគច្រើន​ដែលមាន​ប្រជាជន​មូស្លីម​ធំជាងគេ​បំផុត​លើ​ពិភពលោក។

កងកម្លាំង​សន្តិសុខ​ត្រូវបាន​គេ​មើលឃើញថា​ទទួលបាន​ជោគជ័យ​ក្នុងការ​កម្ទេច​បណ្តាញ​សកម្មប្រយុទ្ធ បន្ទាប់ពី​បុគ្គល​សំខាន់ៗ​ដូចជា លោក Basyir ត្រូវបាន​ប្រមូលផ្ដុំ និង​ដាក់គុក ប៉ុន្តែ​ពួកគេ​ជាច្រើន​បាន​ស្ថិតនៅក្រោម​ដី។

លោក Stanislaus Riyanta អ្នកវិភាគ​ភេរវកម្ម​ដែលមាន​មូលដ្ឋាន​នៅ​ក្រុង​ហ្សា​កាតា​បាន​និយាយថា “​នៅតែមាន​សមាជិក JI ជាច្រើន ហើយ​បន្ទាប់ពី​ការដួលរលំ​នៃ​លោក Osama bin Laden ពួកគេ​បាន​ក្លាយជា​កោសិកា​ជាច្រើន”។ លោក​បន្តថា “​ការដួលរលំ​នៃ​រដ្ឋ​ឥស្លាម​អាច​នឹង​បន្សល់ទុក​នូវ​គម្លាត​សម្រាប់​ឲ្យ​ក្រុម JI កើតឡើង​ជាថ្មី​ម្តងទៀត”។

ប្រទេស​ឥណ្ឌូនេស៊ី​បាន​ព្យាយាម​រឹតបន្តឹង​ច្បាប់​ប្រឆាំង​ភេរវកម្ម​របស់ខ្លួន​ប​ន្ទា​ប់​ពី​ការ​បំផ្ទុះ​គ្រាប់បែក​អត្តឃាត​ជាច្រើន​បានសម្លាប់​មនុស្ស​ជាង ៣០ នាក់​នៅ​ទីក្រុង Surabaya ខេត្ត East Java កាលពី​ឆ្នាំមុន ខណៈដែល​មនុស្ស​រាប់រ​យ​នាក់​ត្រូវបាន​ចាប់ខ្លួន​ក្រោម​ច្បាប់​ថ្មី​ចាប់តាំងពី​ដើមឆ្នាំ ២០១៩៕

Related posts

Leave a Comment