ចំនួន​ការផ្ទុះ​គ្រាប់បែក​នៅ​ទីក្រុង​កា​ប៊ុល​បាន​កើនឡើង​នៅពេល​អាមេរិក​ព្យាយាម​បញ្ចប់​កិច្ចព្រមព្រៀង​ជាមួយ​តា​លី​បង់

ក្រុមមន្ត្រី​បាន​និយាយ​កាលពី​ថ្ងៃ​អង្គា​រថា ការផ្ទុះ​ដ៏​ធំ​មួយ​នៅក្នុង​តំបន់​លំនៅដ្ឋាន​មួយ​នៃ​ទីក្រុង​កា​ប៊ុល​បានសម្លាប់​មនុស្ស​យ៉ាងតិច ១៦ នាក់ បន្ទាប់ពី​ការវាយប្រហារ​របស់​ពួក​តា​លី​បង់​មួយ​ផ្សេងទៀត​ដែល​បាន​កើតឡើង​នៅពេល​ក្រុម​បះបោរ និង​ក្រុង​វ៉ាស៊ីនតោន​ព្យាយាម​បញ្ចប់​កិច្ចព្រមព្រៀង​សន្តិភាព។

ប្រេសិត​ពិសេស​អាមេរិក​លោក Zalmay Khalilzad បាន​ស្ថិតនៅក្នុង​រដ្ឋធានី​អា​ហ្វ​ហ្គា​នី​ស្ថាន​ដើម្បី​ពិភាក្សា​អំពី​កិច្ចព្រមព្រៀង​ដែល​បាន​ស្នើឡើង​ដែល​នឹង​ឃើញ​សហរដ្ឋអាមេរិក​ដក​ក​ង​ទ័ព​ចេញ​ជា​ថ្នូរ​នឹង​ការធានា​សន្តិសុខ​របស់​តា​លី​បង់​នៅពេលដែល​ការ​បំផ្ទុះ​គ្រាប់បែក​បានកើត​ឡើង​កាលពី​ថ្ងៃ​ចន្ទ។

អ្នកនាំពាក្យ​ក្រសួងមហាផ្ទៃ​លោក Nasrat Rahimi បាន​និយាយថា ការផ្ទុះ​នេះ​បណ្តាលមកពី​ត្រាក់ទ័រ​ដែល​ផ្ទុក​ទៅដោយ​គ្រឿងផ្ទុះ​ដែល​ចត​នៅតាម​ជញ្ជាំង​នៅ​តំបន់ Green Village ជា​បរិវេណ​ដ៏​ធំ​មួយ​ដែលមាន​ភ្នាក់ងារ​ផ្តល់ជំនួយ និង​អង្គការ​អន្តរជាតិ​នៅ​ទីនោះ។

លោក Rahimi បាន​បន្ថែមថា ក្រៅពី​អ្នកស្លាប់ ១៦ នាក់​មាន​មនុស្ស ១១៩ នាក់​បាន​រងរបួស​នៅក្នុង​ការវាយប្រហារ​នេះ​ដោយ​កត់សម្គាល់ថា​ប្រតិបត្តិ​ការស្វែងរក និង​ជួយសង្គ្រោះ​បានអូសបន្លាយ​ពេញ​មួយ​យប់។

ការ​បំផ្ទុះ​គ្រាប់បែក​នេះ​គឺជា​ការវាយប្រហារ​លើក​ទី ៣ របស់​ពួក​តា​លី​បង់​ក្នុង​រយៈពេល​ជាច្រើន​ថ្ងៃ​មកនេះ ។ ក្រុម​បះបោរ​បាន​បើក​ការវាយប្រហារ​ជាច្រើន​លើ​ទីក្រុង​សំខាន់​ចំនួន​ពីរ​នៅ​ភាគ​ខាងជើង​កាលពី​ចុង​សប្តាហ៍​ដោយបាន​សម្លាប់ និង​បង្ក​របួស​ដល់​កងកម្លាំង​សន្តិសុខ និង​ជន​ស៊ីវិល​រាប់សិប​នាក់។

ប្រជាជន​នៅ​តំបន់​ជុំវិញ Green Village របស់​ក្រុង​កា​ប៊ុល​មានការ​ខឹងសម្បា​យ៉ាងខ្លាំង​ដែល​សង្កា​ត់របស់​ពួកគេ​ត្រូវបាន​គេ​កំណត់​គោលដៅ និង​បាន​រង​ការវាយប្រហារ​ម្តងទៀត ហើយ​បាន​ស្តីបន្ទោស​ការវាយប្រហារ​ទៅលើ​វត្តមាន​អង្គការ​អន្តរជាតិ​ដែល​នៅក្បែរនោះ។

ប្រជាជន​ក្នុង​តំបន់​បាន​ដុត​កង់ឡាន បញ្ជូន​ផ្សែង​អ័ព្ទ និង​ហុយ​ទៅលើ​មេឃ​នៅពេល​ព្រឹក ហើយ​បាន​បិទ​ផ្លូវធំៗ​នៅក្បែរ​កន្លែង​វាយប្រហារ​នោះ​ផងដែរ ។ សំឡេង​ស្នូរ​កាំភ្លើង​អាច​ត្រូវបាន​គេ​ឮ​តាម​ទូរទស្សន៍​ផ្សាយ​ផ្ទាល់​នៅ​ព្រឹក​ថ្ងៃ​ចន្ទ។

អ្នកស្រុក​ឈ្មោះ Abdul Jamil បាន​ប្រាប់ AFP ថា “​យើង​ចង់​ឲ្យ ជនបរទេស​ទាំងនេះ​ចាក​ចេញពី​សង្កា​ត់របស់​យើង ។ នេះ​មិនមែនជា​លើកទីមួយ​ទេ​ដែល​យើង​រង​ទុក្ខ​ដោយសារ​ពួកគេ ហើយ​យើង​មិន​ចង់​ឲ្យ ពួកគេ​នៅទីនេះ​ទៀត​ទេ”៕

Related posts

Leave a Comment