មេដឹកនាំ​បក្សប្រឆាំង​ប្រទេស Papua New Guinea​ទទូច​ឱ្យ​នាយករដ្ឋមន្ត្រី​គាំទ្រ​កិច្ចព្រមព្រៀង​ឧស្ម័ន​របស់​ក្រុមហ៊ុន Total

កាលពី​ថ្ងៃ​សុក្រ​នេះ មេដឹកនាំ​បក្សប្រឆាំង​របស់​ប្រទេស Papua New Guinea លោក Patrick Pruaitch បាន​ទទូច​ឱ្យ​នាយករដ្ឋមន្ត្រី​របស់​ប្រទេស​នេះ​គាំទ្រ​កិច្ចព្រមព្រៀង​ឧស្ម័ន​ជាមួយ​ក្រុមហ៊ុន Total SA របស់​បារាំង​ជាជាង​ស្វែងរក​ការផ្លាស់ប្តូរ និង​ពន្យារពេល​ការពង្រីក​ការនាំចេញ​ឧស្ម័ន​របស់​ប្រទេស​នេះ​ដែលមាន​ទំហំ​ទឹកប្រាក់​១៣​ពាន់​លាន​ដុល្លារ។

ដោយឡែក កាលពី​ដើមខែ​នេះ រដ្ឋាភិបាល​ដែល​ដឹកនាំ​ដោយ​លោក James Marape បានស្នើ​សុំ​ភ្លាមៗ​ឱ្យមាន​កិច្ចពិភាក្សា​ជាមួយ​ក្រុមហ៊ុន Total ដើម្បី​ពិនិត្យឡើងវិញ​នូវ​កិច្ចព្រមព្រៀង​ឧស្ម័ន Papua LNG ដែលជា​តម្រូវការ​មួយ​ក្នុងចំណោម​តម្រូវការ​ពីរ​សម្រាប់​ក្រុមហ៊ុន Total Exxon Mobil Corp និង​ក្រុមហ៊ុន​ដៃគូ​របស់​ពួកគេ​ដើម្បី​បន្ត​គម្រោង​ធំៗ​ចំនួន​ពីរ​ទៀត។

ទាំង​ក្រុមហ៊ុន Total​និង​រដ្ឋាភិបាល​មិនបាន​ប្រាប់​ពី​ស្ថានភាព​នៃ​កិច្ចពិភាក្សា​នោះទេ ប៉ុន្តែ​ដៃគូ​របស់​ក្រុមហ៊ុន Total ក្នុង​គម្រោង Papua LNG​គឺ​ក្រុមហ៊ុន Oil Search Ltd​បាន​លើកឡើងថា ក្រុមហ៊ុន​ជឿជាក់​លើ​កិច្ចព្រមព្រៀង​ដែល​បាន​ចុះហត្ថលេខា​ជាមួយ​លោក Peter O’Neill ដែលជា​អ្នក​កាន់តំណែង​មុន​លោក Marape។

មេដឹកនាំ​បក្សប្រឆាំង​ដដែល​នេះ​បានឱ្យដឹង​ក្នុង​សេចក្តីថ្លែងការណ៍​មួយ​ថា “​ការ​លុប​កិច្ចព្រមព្រៀង Papua LNG ដែល​បាន​ចុះហត្ថលេខា​នៅ​ខែមេសា​នឹង​បង្ក​អន្តរាយ​ដល់​ចក្ខុវិស័យ​សម្រាប់​ការ​ងើប​ឡើងវិញ​នៃ​សេដ្ឋកិច្ច​របស់​ប្រទេស PNG ថែមទាំង​ធ្វើឱ្យ​កេរ្តិ៍ដំណែល​របស់​រដ្ឋាភិបាល​លោក O’Neill នៃ​ការធ្លាក់ចុះ​តម្លៃ​ប្រាក់​ឈ្នួល​និង​កម្រិត​ការងារ​ត្រូវ​បន្ត​ជាប់​បែបនេះ​រហូត​ជាមិនខាន”។

នាយក​គ្រប់គ្រង​ក្រុមហ៊ុន Oil Search លោក Peter Botten បានឱ្យដឹង​នៅ​ថ្ងៃទី​២០ សីហា​នេះ​ថា ភាគី​ទាំងអស់​មាន​គោលបំណង​បញ្ចប់​ការពិភាក្សាគ្នា​នៅ​ចុងខែ​នេះ ខណៈ​គម្រោង Papua LNG បានរៀបចំ​ការដេញថ្លៃ​ពី​អ្នកម៉ៅការ​ដើម្បី​ធ្វើការ​វិស្វកម្ម និង​រចនា​ប្លង់​បឋម​។ ប៉ុន្តែ​ការដេញថ្លៃ​ទាំងនោះ​នឹងត្រូវ​ផុតកំណត់​នៅ​ខែកញ្ញា​ខាងមុខ៕

Related posts

Leave a Comment