គំរូល្អ! ចំទិវានៃក្តីស្រឡាញ់ ពួកគាត់នាំគ្នា ប្រមូលសំរាមក្នុងប្រឡាយទឹកស្អុយ​ នៅស្វាយដង្គំ ក្រុងសៀមរាប ធ្វើឲ្យមហាជនចាប់អារម្មណ៍ និងពេញចិត្តជាខ្លាំង

នៅថ្ងៃទី ១៥ ខែកុម្ភៈ ឆ្នាំ ២០២០ នេះ គេប្រទះឃើញហ្វេសប៊ុក “មន្ទីរសាធារណការ និងដឹកជញ្ជូន ខេត្ដសៀមរាប” បានបង្ហោះរូបភាពជាច្រើនសន្លឹក ដែលទទួលបានមកពីម្ចាស់ហ្វេសប៊ុក Sithol Chheak​ ធ្វើឲ្យមហាជនជាច្រើន បង្ហាញអារម្មណ៍កោតសរសើរយ៉ាងខ្លាំង ដោយពួកគេទាំងនោះនាំគ្នាប្រមូលសំរាមក្នុងប្រឡាយទឹកស្អុយ​ នៅស្វាយដង្គំ ក្រុងសៀមរាប ចំទិវានៃក្តីស្រឡាញ់ ម្សិលមិញនេះ។ ហ្វេសប៊ុក មន្ទីរសាធារណការ ក៏បានភ្ជាប់សារបញ្ជាក់ថា៖

““អនាម័យ នាំ​មក​នូវ​សុខភាពល្អ” នេះ​គឺ​ជា​ពាក្យ​ស្លោក​មួយ​ឃ្លា ដែល​ប្រជាពលរដ្ឋ​ខ្មែរ​ភាគ​ច្រើន បាន​ដឹង​ឮ​ស្ទើរ​គ្រប់​ៗ​គ្នា។ ប៉ុន្តែ​នៅ​ក្នុង​ជីវភាព​ប្រចាំ​ថ្ងៃ​វិញ បញ្ហា​អនាម័យ​មួយ​ចំនួន ហាក់​ដូចជា​មិន​សូវ​មាន​ការ​ប្រតិបត្តិ អោយ​បាន​ខ្ជាប់​ខ្ជួន​ដើម្បី​សុខភាព ឬ​សោភ័ណ​ភាព​នោះ​ទេ។ ជាក់​ស្តែង ការ​បោះចោល​សំរាម​ពាសវាល​ពាសកាល ត្រូវ​បាន​គេ​ប្រទះ​ឃើញ ទាំង​នៅ​រាជធានី ទី​ប្រជុំ​ជន តំបន់​រមណីយដ្ឋាន និង​តំបន់​ជន​បទ​ចុង​កាត់​មាត់​ញក។

ការ​បោះចោល​សំរាម​នេះ គឺ​ជា​កញ្ចក់​ឆ្លុះ​បញ្ចាំង ពី​ចំណេះ​ដឹង មារយាទ និង​ការ​ទទួល​ខុស​ត្រូវ របស់​ពលរដ្ឋ​ខ្មែរ​ម្នាក់​ៗ។ សូមបងប្អូនប្រជាពលរដ្ឋយើង មេត្តាទុកដាក់សម្រាមអោយមានរបៀបរាបរយ ដើម្បីទីក្រុងយើងស្អាត។ បញ្ជាក់: (ពួកគាត់បានប្រេីទឹកសំលាប់មេរោគលេីខ្លួនគាត់រួចហេីយ) Credit: Sithol Chheak​ (ស្វាយដង្គំ​ ក្រុងសៀមរាប)”៕

Related posts

Leave a Comment