ចំនួន​អ្នក​ស្លាប់​ដោយសារ​អេ​បូ​ឡា នៅ​សាធារណរដ្ឋ​ប្រជាធិបតេយ្យ​កុង​ហ្គោ​ឡើង​ដល់​ទៅ​២.០០០​នាក់

ការ​កើត​មាន​ជំងឺ​អេ​បូ​ឡា នៅ​ក្នុង​សាធារណរដ្ឋ​ប្រជាធិបតេយ្យ​កុង​ហ្គោ ​បាន​បង្ហាញ​ឲ្យ​ឃើញ​ថា មិន​មាន​សញ្ញា​នៃ​ការ​ធ្លាក់​ថយ​ចុះ​ឡើយ កាលពី​ថ្ងៃ​សុក្រ នៅ​ពេល​ជិត​ឈាន​ដល់​ការ​ធ្វើ​ទស្សនកិច្ច​របស់​ប្រមុខ​នៃ​អង្គការសហប្រជាជាតិ​ឆ្ពោះ​ទៅ​កាន់​ប្រទេស​នេះ​ ដោយ​ចំនួន​មនុស្ស​ស្លាប់​បាន​កើន​ឡើង​ដល់​ទៅ​២.០០០​នាក់​ និង​មាន​ស្លាប់​ថ្មី​ម្នាក់ទៀត​នៅ​ក្នុង​ប្រទេស​អ៊ូ​ហ្គ​ង់​ដា ក្បែរ​ខាង​គ្នា​នោះ។

ករណី​ចុងក្រោយបង្អស់​នៅក្នុង​ប្រទេស​អ៊ូ​ហ្គ​ង់​ដា នោះ​គឺ​មរណភាព​របស់​ក្មេងស្រី​អាយុ​៩​ឆ្នាំ​ម្នាក់​ដែល​ក​ពី​សាធារណរដ្ឋ​ប្រជាធិបតេយ្យ​កុង​ហ្គោ ដែល​ធ្វើ​ឲ្យ​មានការ​ភ័យ​ខ្លា​ថា​វីរុស​អាច​ឆ្លងកាត់​ព្រំដែន​ដ៏​មាន​ច្រក​ឆ្លងកាត់​ជាច្រើន​នៃ​ប្រទេស​អាហ្វ្រិក​កណ្ដាល ​ដែល​ជំងឺ​អេ​បូ​ឡា​ បាន​ផ្ទុះឡើង​កាលពី​ខែ​សីហា​ឆ្នាំទៅ​មិញ។

មន្ត្រី​សុខាភិបាល​នៃ​សាធារណរដ្ឋ​ប្រជាធិបតេយ្យ​កុង​ហ្គោ​ បាន​និយាយ​កាលពី​ល្ងាច​ថ្ងៃ​ព្រហស្បតិ៍​ថា មាន​សរុប​ស្លាប់​២.០០៦​នាក់​(១.៩០១​នាក់ ​ត្រូវ​បាន​អះអាង​ថា ​ជា​អ្នក​កើត​ជំងឺ​អេ​បូ​ឡា ហើយ​អ្នក​ស្លាប់​១០៥​នាក់​គ្រាន់តែ​ប្រហែល​តែប៉ុណ្ណោះ​) ចាប់តាំង​ពី​ខែ​សីហា ឆ្នាំ​២០១៨​។ មន្ត្រី​បាន​និយាយ​បន្ថែមថា មាន​មនុស្ស​៩០២​នាក់​ត្រូវបាន​ព្យាបាល​សះស្បើយ។

ចំនួន​នេះ ​ត្រូវ​បាន​ផ្សាយ​ចេញ​រយៈពេល​មួយថ្ងៃ​មុន​លោក​អគ្គលេខាធិការ​សហ​ប្រជាជាតិ Antonio Guterres មក​ធ្វើ​ទស្សនកិច្ច​នៅ​ប្រទេស​នេះ៕

Related posts

Leave a Comment