ស្គាល់​មុខ មិន​ស្គាល់ចិត្ត មិត្ត​ក្បត់​មិត្ត​ ស៊ីដាច់​ម៉ូតូ​ទំនើប​មួយ​គ្រឿង​

ភ្នំពេញ ៖ ពាក្យចាស់​ពោល​ថា (ស្គាល់​មុខមាត់ តែ​មិន​ស្គាល់​ចិត្ត​) វាពិត​ជាត្រឹមត្រូវណាស់ ​ហើយ​ពាក្យ​អប់រំ​ប្រៀនប្រដៅ​របស់​មនុស្ស​ចា​ស់​ គឺ​ពួកគាត់​បាន​​ឆ្លងកាត់​រាល់​ល្បិចកល​បោកប្រាស់​ពី​ជន​អាក្រក់ ​មុន​មនុស្ស​ជំនាន់​ក្រោយ​។

ជាក់ស្ដែង​ មាន​ករណី​បទល្មើស​មួយ​បាន​កើត​ឡើង​ដូច​ពាក្យ​ចាស់​ទូន្មាន​មែន ដោយ​យុវជន​ម្នាក់​ ​អស់​ទ្រព្យ​សម្បត្តិ​ពី​ខ្លួន ​ព្រោះតែ​មិត្ត​ស្និទ្ធស្នាល​ខ្លួនឯង​ ប្រើ​ល្បិចកល​បោកប្រាស់​យក​ម៉ូតូ​ទំនើប​អស់​មួយគ្រឿង​បានសម្រេច​​។​ ប៉ុន្តែ​មិត្ត​កំហូច​នោះ ក៏​ត្រូវបាន​​បង្ហាញមុខ​មាត់​ពិត​ឲ្យ​មហាជន​ស្គាល់​វិញ​ផងដែរ។

ពាក់ព័ន្ធ​នឹង​ករណី​ខាងលើ​នោះ ​ត្រូវបាន​កម្លាំង​កងរាជអាវុធហត្ថ​រាជធានី​ភ្នំពេញ​អះអាង​ឲ្យ​ដឹងថា នៅ​ថ្ងៃទី​៣១ ខែ​សីហា ឆ្នាំ​២០១៩ សមត្ថកិច្ច​ជំនាញ​ នៃ​ការិយាល័យ​ស្រាវជ្រាវ​បទល្មើស​ព្រហ្មទណ្ឌ កងរាជអាវុធហត្ថ​រាជធានី​ភ្នំពេញ បាន​បញ្ជូន​ជនសង្ស័យ​០១​នាក់ ទៅ​តុលាការ ដើម្បី​ផ្ដន្ទាទោស​តាម​ច្បាប់ ពាក់ព័ន្ធ​ករណី រំលោភ​ទំនុកចិត្ត​ ក្រោយពី​ធ្វើការ​ចាប់ខ្លួន​ជាក់ស្ដែង​តាម​បណ្តឹង​របស់​ភាគី​រង​គ្រោះ​រួចមក។

តាម​ការ​ឲ្យ​ដឹង​ មិត្ត​កំហូច​ដែល​ស៊ីដាច់​ម៉ូតូ​មិត្តភ័ក្ដិ​នោះ​ ឈ្មោះ ជុំ សុជាតិ ភេទ​ប្រុស អាយុ​២១​ឆ្នាំ ត្រូវ​បាន​កម្លាំង​មូលដ្ឋាន​អាវុធហត្ថ​ខណ្ឌ​៧​មករា​ឃាត់ខ្លួន កាលពី​ថ្ងៃទី​២៧​សីហា នា​វេលា​ម៉ោង​១៣​និង​៣០​នាទី បន្ទាប់ពី​រូបគេ​បាន​ខ្ចី​ម៉ូតូ​០១​គ្រឿង ម៉ាក​ហុងដា​សេ ១២៥ ពណ៌​ខ្មៅ ស៊េរី​ឆ្នាំ​២០១៨ ស្លាក​លេខ 1HE-8168 របស់​​ឈ្មោះ ភឿន សុផាត ភេទ​ប្រុស អាយុ​២៣​ឆ្នាំ ជា​មិត្តភ័ក្ដិ​ធ្វើការ​ជាមួយគ្នា​។

ជា​មួយ​គ្នា​នោះ​ដែរ កាលពី​ថ្ងៃទី​២៤​សីហា វេលា​ម៉ោង​១២និង​២០​នាទី ចំណុច​ច្រកចូល​ផ្សារ​អូ​ឡាំ​ព្យា សង្កាត់​វាលវង់ ខណ្ឌ​៧​មករា រាជធានី​ភ្នំពេញ ជនសង្ស័យ​បាន​ខ្ចី​ម៉ូតូ​ជនរងគ្រោះ ​ដោយ​ប្រាប់ថា​ ជិះ​យក​ទៅ​ដក់​លុយ​នៅ​ធនាគារ អេស៊ីលីដា មួយ​ភ្លែត។ ពេល​បាន​ម៉ូតូ​ហើយ​ ជន​កំហូច​បាន​ជិះ ទៅ​ណា​ហ្កា​វើ​ល ហើយ​យក​ម៉ូតូ​របស់​ជនរងគ្រោះ ទៅ​បញ្ចាំ​បាន​តម្លៃ​៨០០​ដុល្លារ​អាមេរិក។ បន្ទាប់មក​​យក​លុយ​នោះ​ទៅលេង​ល្បែង​ហ្គេម​បាញ់​ត្រី​នៅ​កោះ​ពេជ្រ ចាញ់​អស់​។

ក្នុង​នោះ​ដែរ ក្រោយ​អស់​លុយ​ពី​ខ្លួន​ហើយ​ ជនសង្ស័យ​បាន​គេច​ខ្លួន​ទៅ​ពួន​នៅផ្ទះ​​មិត្តភ័ក្ដិ​ នៅ​ម្តុំ​វិមាន​ឯករាជ្យ ព្រមទាំង​បិទ​ទូរស័ព្ទ ដើម្បី​កុំ​ឲ្យ​ជនរងគ្រោះ​ខ​ល​ចូល និង​រក​រូបគេ​ឃើញ។ ប៉ុន្តែ​ទោះបី​ខំ​លាក់ខ្លួន​យ៉ាងណា​ក៏ដោយ ក៏​មនុស្ស​កំហូច​នោះ នៅតែ​ត្រូវបាន​សមត្ថកិច្ច​អាវុធហត្ថ​ខណ្ឌ​៧​មករា ស្រាវជ្រាវ​ឃាត់ខ្លួន​យកមក​សួរ​នាំនៅ​ទីបញ្ជាការ​កងរាជអាវុធហត្ថ​រាជធានី​ភ្នំពេញ ​និង​កសាង​សំណុំរឿង​បញ្ជូន​ទៅ​តុលាការ​ផ្ដន្ទាទោស​តាមច្បាប់​ដដែល​៕​

Related posts

Leave a Comment