ភ្នំពេញ ៖ នៅលើទំព័រហ្វេសប៊ុកលោក ហេង ឡុង មុននេះបានប្រកាសនូវដំណឹងដ៏គួរឲ្យរីករាយខណៈបេក្ខជនដែលប្រឡងជាប់និទ្ទេស A នាសម័យប្រឡង ១៩ សីហា ដែលទើបប្រកាសលទ្ធផលព្រឹកមិញនេះក្នុងចំណោមខេត្ត៣ នឹងត្រូវទទួលបានម៉ូតូអាសង់ម្នាក់មួយគ្រឿង រួមទាំងគ្រូក្នុងខេត្តព្រៃវែងក៏ទទួលបានដូចគ្នាពីសំណាក់ឯកឧត្តម ស សុខា។ ក្នុងសំណេរបង្ហាញពីទឹកចិត្តដ៏ថ្លៃថ្លាក្នុងចេតនាលើកស្ទួយជំរុញបន្ថែមទឹកចិត្តសិស្សានុសិស្សពីសំណាក់រដ្ឋលេខាធិការក្រសួងអប់រំ យុវជន និងកីឡា សារដដែលលោក ហេង ឡុង បញ្ជាក់យ៉ាងច្បាស់ថា «សូមអបអរសាទរសិស្សជ័យលាភីជាប់បាក់ឌុបនិទ្ទេស A ចំនួន៨៤នាក់ ក្នុងបីខេត្តរួមមានខេត្តព្រៃវែង ខេត្តបាត់ដំបង និងខេត្តបន្ទាយមានជ័យ ដែលត្រូវបាន ឯកឧត្តម ស សុខា ឧបត្ថម្ភម៉ូតូហុងដាដ្រីម ឆ្នាំ២០១៦ ម្នាក់១គ្រឿង រួមទាំងលោកគ្រូ អ្នកគ្រូ នៅខេត្តព្រៃវែងតាមជំនាញចំនួន ២៧រូប ទៀត សរុប ១១១គ្រឿង»។
