ព្រះនាងតូច នរោត្តម ជេនណា ទ្រង់ព្រះកន្សែងជាខ្លាំង ខណៈពេលដង្ហែ ព្រះសព សម្តេចរាជបុត្រីព្រះរៀម នរោត្តម បុប្ផាទេវី ឆ្ពោះទៅ ព្រះ មេរុ ដេីម្បី ប្រារព្ធ ព្រះពិធី ថ្វាយព្រះភ្លើង ខាងមុខវត្តបទុមវតី

ភ្នំពេញ៖ កាលពីព្រឹកមិញនេះ ថ្ងៃទី២៥ ខែវិច្ឆិកា ឆ្នាំ២០១៩ ពិធីដង្ហែព្រះរបរមសព សម្តេចរាជបុត្រីព្រះរៀម នរោត្តម បុប្ផាទេវី ឆ្ពោះទៅ​ព្រះ​មេរុ​ ដេីម្បី​ប្រារព្ធ​ព្រះពិធី​ថ្វាយ​ព្រះ​ភ្លើង​ខាង​មុខ​វត្តបទុមវតី​ ក្នុងនោះដែរ មហា​ជន​បានអញ្ជើញ​ចូល​រួម​ដង្ហែ​ ដេីម្បី​ថ្វាយ​ព្រះ​ដំណេីរ​ជាលេីកចុងក្រោយ​ ក្នុង​ក្បួន​មហា​ជន​បានឈរ​តាម​បណ្តោយ​ផ្លូវ​ ដែល​គណៈកម្មាធិការ​បុណ្យ​ជាតិ​រៀប​ចំ​។

ទន្ទឹមនឹងនេះដែរ ព្រះករុណាជាអម្ចាស់ជីវីតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវរាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គទាំងទ្វេសព្វព្រះរាជហឫទ័យស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះពិធីថ្វាយព្រះភ្លើងព្រះសព សម្តេចរាជបុត្រីព្រះរៀម នរោត្តម បុប្ផាទេវី។

ក្នុងទិដ្ឋភាពដ៏សែនក្រៀមក្រំនេះ ព្រះនាងតូច នរោត្តម ជេនណា ទ្រង់ព្រះកន្សែងខ្លាំងនៅក្នុងព្រះពិធីថ្វាយព្រះភ្លើង សម្តេចរាជបុត្រីព្រះរៀម នរោត្តម បុប្ផាទេវី ដែលធ្វើឲ្យប្រជាពលរដ្ឋ ក្រោយឃើញទិដ្ឋភាពបែបនេះ គឺពិតជាមានភាពសោកសង្រេងជាទីបំផុត។ ក្នុងនោះដែរ ព្រះនាងតូច នរោត្ដម ជេនណា ទ្រង់បានភ្ជាប់សារមួយឃ្លាថា៖”កម្មវីធីព្រឹកមិញនេះ ដង្ហែព្រះសព សម្តេចរាជបុត្រីព្រះរៀម នរោត្តម បុប្ផាទេវី ឆ្ពោះទៅ ព្រះមេរុ ដេីម្បីប្រារព្ធព្រះពិធីថ្វាយ ព្រះភ្លើង ខាងមុខវត្តបទុមវតី។ ជេនណា សូមថ្វាយមហាព្រះរាជកុសល”។

គូសរំលឹកផងដែរថា កាលពីថ្ងៃច័ន្ទ ទី​១៨ ខែ​វិច្ឆិកា ឆ្នាំ​២០១៩​ វេលាម៉ោង១២៖៣០នាទី ​សម្តេចរាជបុត្រីព្រះរៀម នរោត្តម បុប្ផាទេវី បានយាងសោយព្រះពិរាល័យ។ ក្នុងនោះដែរ ព្រះអង្គ បានឆ្លងកាត់ដំណើរជីវិតយ៉ាងលំបាកមួយនៅក្នុងសតវត្សរ៍ទី២០ ដែលពោរពេញទៅដោយអនុស្សាវរីយ៍សម្បូរ​បែប​ជា​ប្រវត្តិសាស្ត និង​ភាព​រំជើបរំជួល​ផ្នែក​សិល្បៈ។

ហើយ​នៅ​ពេល​ដែល​ព្រះរាជាណាចក្រ​បាន​បាត់​បង់​នូវ​អ្វីៗ​ទាំង​អស់ និង​ខិតខំ​ព្យាបាល​ដំបៅ​ដ៏​ជ្រៅ​របស់​ខ្លួន សម្តេចរាជបុត្រីព្រះរៀមបានព្យាបាលដំបៅដែលអន្ទោលតាមព្រះកាយ​របស់លោកជាប់ជានិច្ច តាមរយៈ​របាំ​ព្រះ​រាជ​ទ្រព្យ ហើយលោកបានរៀបចំធ្វើឱ្យរបាំបុរាណរបស់ដូនតា​មួយ​នេះ​រស់​ឡើង​វិញ​ ជា​របាំ​ដែល​ពី​មុន​គឺ​ជា​ដួង​ព្រលឹង​ ហើយ​ពេល​នេះ នៅ​តែ​ជា​ដួង​ព្រលឹង​របស់​ប្រជា​ជន​ខ្មែរ។

នោះគឺជាស្នាព្រះហស្ត មួយដែលគ្មានអ្នកណាម្នាក់អាចដកចេញពី សម្តេចរាជបុត្រីព្រះរៀមបានទៀតឡើយ។ ស្នាព្រះហស្ត ដែលមានជីវិតរស់ កេរ្តិ៍​ឈ្មោះ​ល្បី​ល្បាញ​​បន្ត​មក​ដល់​បច្ចុប្បន្ន​នេះ ក៏​ដោយសារ​តែ​ការងារ​ដ៏​លំបាកលំបិន​របស់​ព្រះអង្គ លើសពីការស្មាន។ ព្រះអង្គ នៅតែបន្តកសាងជារៀងរហូត តាមរយៈ​របាំ​និង​សិល្បៈ នូវ​ចំណង​រវាង​អតីតកាល​និង​បច្ចុប្បន្នកាល ការ​បន្ត​នូវ​ប្រពៃណី​ទំនៀមទំលាប់​ដែល​ចាំ​បាច់​ ​ដើម្បី​ប្រវត្តិសាស្ត្រ​និង​ឯកភាព​ជាតិខ្មែរ។ ​ប្រជាជាតិ​នីមួយៗ ក្នុង​គ្រប់​សម័យ​កាល តែង​តែមានឥស្សរជន​ដែល​ជា​ប្រភព​នៃ​គំនិត​ច្នៃ​ប្រឌិត​សិល្បៈ នោះ​គឺ​ម្ចាស់​ក្សត្រី​ប្រកប​ដោយ​មោទនភាព មាន​វណ្ណសម្បត្តិ​​ដ៏​វិសេស​នេះ​ហើយ​ដែល​តំណាង​ឱ្យ​ជម្រៅ​បេះ​ដូង​របស់​ប្រជាជន​គ្រប់​រូប។

Related posts

Leave a Comment